Inklużjoni, Ugwaljanza u Ħarsien Soċjali

L-Assistenza għal Diżimpjieg tista’ tingħata lil persuna responsabbli tal-familja li tkun għalqet it-tlieta u għoxrin (23) sena u li tkun qed tirreġistra għax-xogħol taħt il-Parti 1 tar-Reġistru tad-Diżimpjieg. L-Assistenza għal Diżimpjieg ma tistax tingħata, jekk il-persuna qiegħdha tgħix ma’ konjuġi / sieħeb / sieħba li j/tkun f’impjieg.

Il-Benefiċċju Speċjali għal Diżimpjieg jista’ jingħata lil persuna li ħallset Kontribuzzjonijiet tas-Sigurtà Soċjali tal-Klassi 1 jew tal-Klassi 2, tikkwalifika għall-Assistenza għal Diżimpjieg u hija persuna responsabbli tal-familja.

Il-Benefiċċju ta’ Waqt l-Impjieg huwa mmirat biex jassisti lill-koppji jew ġenituri waħedhom li jkunu jaħdmu u għandhom tfal taħt it-tlieta u għoxrin (23) sena, li għadhom dipendenti u jgħixu fl-istess residenza tagħhom.

Dan il-benefiċċju mhuwiex applikabbli għal dawk li bħalissa qed jirċievu t-Tnaqqis Gradwali tal-Benefiċċji.

Ġenituri waħedhom bi tfal taħt it-tlieta u għoxrin (23) sena, jingħataw Tnaqqis Gradwali tal-Benefiċċji sakemm jaħdmu mill-inqas għaxar (10) sigħat fil-ġimgħa bir-rata tal-Paga Minima Nazzjonali fis-siegħa. F’każijiet simili, ir-rekwiżit li tkun irċeviet Assistenza Soċjali għal sena fl-aħħar tliet (3) snin, ma japplikax.

Il-benefiċjarji tal-Assistenza Soċjali li jsibu mpjieg jistgħu jagħżlu li japplikaw għall-iskema ta’ Tnaqqis Gradwali tal-Benefiċċji jekk jaqilgħu tal-inqas il-paga minima nazzjonali jew aktar, u jew ikunu rċevew l-Assistenza Soċjali jew l-Għajnuna għal Diżimpjieg jew Benefiċċju Speċjali għal Diżimpjieg għal mill-inqas sena (1) fl-aħħar tliet (3) snin.

Il-benefiċjarji tal-Għajnuna Soċjali jistgħu jagħżlu l-iskema ta’ Tnaqqis Gradwali tal-Benefiċċji f’każ li l-konjuġi/sieħeb/sieħba bdiet taħdem bi qligħ, j/taqla’ tal-anqas il-paga minima nazzjonali jew aktar u jekk il-benefiċjarju jkun irċieva l-Assistenza Soċjali għal mill-inqas sena fl-aħħar tliet (3) snin.

Benefiċjarji ta’ Assistenza Soċjali li jibdew jaħdmu bi qligħ bħala persuni li jħaddmu lilhom infushom, jistgħu jagħżlu l-iskema ta’ Tnaqqis Gradwali tal-Benefiċċju jekk jaqilgħu tal-inqas il-paga minima nazzjonali jew aktar, u jekk ikunu rċevew Assistenza Soċjali jew Għajnuna tal-Qgħad għal mill-inqas sena f’dawn l-aħħar tliet (3) snin.