Benefiċċju għal Diżimpjieg – Ċittadini tal-Unjoni Ewropea

Kull kontribuzzjoni tas-sigurtà soċjali mħallsa f'Malta hija ekwivalenti għal ġurnata waħda ta’ benefiċċju għal diżimpjieg. Dan il-benefiċċju jitħallas għal massimu ta’ 6 xhur, għalkemm jiddependi fuq kemm l-applikant ikun ħadem f'Malta.

Biex titlob il-benefiċċju għal diżimpjieg, l-ewwel wieħed irid jirreġistra bħala persuna li qed tfittex xogħol ma’ Jobsplus. Barra minn hekk, meta min jagħmel it-talba ma jkollux biżżejjed kontribuzzjonijiet tas-sigurtà soċjali biex jikkwalifika għall-benefiċċju għal diżimpjieg, id-Dipartiment tas-Sigurtà Soċjali jkun jeħtieġ jikkonferma l-perjodi ta’ assigurazzjoni u impjieg jew xogħol għal rasu, f'pajjiż ieħor tal-Unjoni Ewropea, biex jitqies għall-ħlas tal-benefiċċju għal diżimpjieg. Biex jitħaffef dan il-proċess, l-applikant jista’ jipproduċi formola U1 biex jiċċertifika l-perjodi ta' assigurazzjoni u impjieg jew xogħol għal rasu, f'dawn l-aħħar sentejn f'pajjiż ieħor tal-Unjoni Ewropea.

Id-Dipartiment tas-Sigurtà Soċjali jkun jeħtieġ ukoll l-FS3s (id-dikjarazzjoni finali tal-qligħ tal-benefiċjarju pprovduta minn min iħaddem) għall-perjodu li l-applikant ikun ħadem f'Malta.

Barra minn hekk, jekk min jagħmel it-talba jkun jixtieq ifittex xogħol f'pajjiż ieħor waqt li jkun qed jirċievi benefiċċju għal diżimpjieg, taħt ċerti kundizzjonijiet l-applikant jista’ jesporta għal darba l-benefiċċju għal diżimpjieg għal perjodu limitat ta' żmien, filwaqt li:

• L-applikant irreġistra ma’ Jobsplus għal mill-inqas 4 ġimgħat wara li ġie bla xogħol. L-idea sottostanti hija li l-applikant għandu l-ewwel jeżawrixxi l-possibilitajiet kollha li jsib xogħol ġdid f'Malta qabel ma jestendi t-tfittxija f'pajjiżi oħra.

• L-applikant li qed jagħmel it-talba huwa rreġistrat bħala persuna li qed tfittex ix-xogħol u jrid jipprovdi dokument U2 (awtorizzazzjoni biex jesporta l-benefiċċji għal diżimpjieg) li jippermetti lir-rikorrent li jesporta l-benefiċċju għal diżimpjieg.

• Fi żmien 7 ijiem wara t-tluq minn Malta, l-applikant irid jirreġistra mas-servizzi tal-impjieg tal-pajjiż li fih qed ifittex xogħol. L-applikant għandu jikkonforma mal-obbligi u l-proċeduri ta' kontroll organizzati mis-servizzi tal-impjiegi ta' dak il-pajjiż li jkun sejjer fih.

• Il-persuna li qed tagħmel it-talba mbagħad tkun intitolata li tirċievi l-benefiċċju għal diżimpjieg għal perjodu ta’ 3 xhur mid-data li fiha waqaf li jkun disponibbli għal Jobsplus. Id-Dipartiment tas-Sigurtà Soċjali jista’ jestendi dan il-perjodu sa massimu ta' 6 xhur, billi japplika b'U015 (Perjodu ta' Estensjoni tal-Esportazzjoni). Madankollu, min jagħmel it-talba għandu jipprovdi prova li wieħed għandu prospetti tajbin biex isib xogħol.

Ikklikkja hawn għal Skeda tar-Rati tal-Benefiċċji.