Paġna Ewlenija / Libertà tal-Informazzjoni

Libertà tal-Informazzjoni

Awtorità Pubblika: Servizz.gov

Deskrizzjoni tal-istruttura, il-funzjonijiet u r-responsabbiltajiet tal-Aġenzija

Servizz.gov ġiet stabbilita permezz tal-Ordni li Tistabbilixxi lil Servizz.gov bħala Aġenzija, 2016 (L.S. 595.19). L-Aġenzija sservi bħala punt ċentrali ta' kuntatt bejn is-Servizz Pubbliku u l-pubbliku, u tiffaċilita l-aċċess għas-servizzi governattivi u għall-informazzjoni permezz ta' diversi kanali ta' servizz.

Il-funzjonijiet tal-Aġenzija jinkludu l-għoti ta' informazzjoni u gwida dwar is-servizzi governattivi, l-assistenza lill-individwi fl-aċċess għas-servizzi pubbliċi, il-faċilitazzjoni tal-komunikazzjoni bejn l-utenti tas-servizzi u l-awtoritajiet pubbliċi, kif ukoll l-appoġġ għat-titjib kontinwu u l-aċċessibbiltà tas-servizzi pubbliċi.

Servizz.gov tipprovdi s-servizzi tagħha permezz ta' network ta' ċentri ta' servizz reġjonali u speċjalizzati, il-Freephone 153, pjattaformi online, kanali ta' komunikazzjoni elettronika u servizzi oħra ta' appoġġ lill-klijenti. Fit-twettiq tal-funzjonijiet tagħha, l-Aġenzija taħdem mill-qrib mal-Ministeri, id-dipartimenti tal-Gvern, l-aġenziji u entitajiet oħra tas-settur pubbliku sabiex tiffaċilita l-aċċess għas-servizzi u l-informazzjoni tal-Gvern.

L-Aġenzija topera taħt id-direzzjoni tal-Kap Eżekuttiv u hija organizzata f'dawn l-oqsma funzjonali ewlenin: l-Operat, Riċerka u Żvilupp, Servizzi Korporattivi u Riżorsi Umani, Finanzi u Akkwist, Teknoloġija tal-Informazzjoni u l-Komunikazzjoni, u Relazzjonijiet Pubbliċi u Marketing.

Deskrizzjoni ġenerali tal-kategoriji ta' dokumenti li l-Aġenzija għandha (inklużi dokumenti eżenti)

Servizz.gov iżżomm dokumenti relatati mal-funzjonijiet u l-attivitajiet tagħha, fosthom dawn li ġejjin:

dokumentazzjoni dwar l-istrateġija, il-politika u l-governanza;
dokumentazzjoni dwar programmi u proġetti;
dokumentazzjoni dwar id-disinn tas-servizzi u l-operat;
dokumentazzjoni dwar it-teknoloġija tal-informatika u l-komunikazzjoni;
dokumentazzjoni dwar l-operat u teknika;
dokumentazzjoni dwar l-akkwist, kuntratti u konformità;
dokumentazzjoni finanzjarja;
dokumentazzjoni dwar ir-riżorsi umani u l-amministrazzjoni;
dokumentazzjoni relatata mas-saħħa u s-sigurtà;
dokumentazzjoni dwar il-komunikazzjoni u l-involviment tal-partijiet interessati;
korrispondenza u rekords relatati mal-każijiet;
dokumentazzjoni ta' riċerka u analiżi;
rekords arkivjali u storiċi.

Deskrizzjoni tal-manwali kollha u ta' tipi oħra ta' dokumenti simili li fihom politiki, prinċipji, regoli jew linji gwida skont liema jittieħdu deċiżjonijiet jew isiru rakkomandazzjonijiet fir-rigward tal-membri tal-pubbliku (inklużi entitajiet korporattivi u impjegati tal-awtorità pubblika fil-kapaċità personali tagħhom)

Servizz.gov iżżomm manwali u dokumenti simili li jirregolaw il-proċessi tagħha ta' teħid ta' deċiżjonijiet u operat, inklużi:

proċeduri għall-għoti tas-servizzi u linji gwida dwar is-servizz lill-klijent;
proċeduri għall-immaniġġjar tal-ilmenti u l-eskalazzjoni tagħhom;
politiki dwar il-protezzjoni tad-data u l-governanza tal-informazzjoni;
politiki dwar ir-riżorsi umani u proċeduri relatati;
manwali operazzjonali relatati mal-proċessi tal-għoti tas-servizzi;
manwali u linji gwida għas-servizzi diġitali u formoli elettroniċi;
proċeduri u gwidi għall-utenti relatati ma' sistemi ta' ġestjoni tal-każijiet u pjattaformi tal-ICT;
manwali li jirregolaw il-proċessi, il-kontrolli u l-operat tekniku tal-ICT;
politiki tal-Gvern dwar l-ICT, standards ta' sigurtà u oqfsa regolatorji;
linji gwida tekniċi u dwar l-operat interni li jappoġġjaw id-disinn u l-għoti tas-servizzi.

Dikjarazzjoni tal-informazzjoni li għandha tkun disponibbli għall-membri tal-pubbliku li jixtiequ jiksbu aċċess għal dokumenti uffiċjali mill-awtorità pubblika, liema dikjarazzjoni għandha tinkludi d-dettalji tal-uffiċjal jew tal-uffiċjali lil min għandhom jintbagħtu t-talbiet għal tali aċċess

It-talbiet għall-aċċess għal dokumenti uffiċjali miżmuma minn Servizz.gov għandhom isiru bil-miktub u jistgħu jiġu sottomessi:

permezz tal-posta elettronika fuq: foi.servizz@gov.mt; jew
b'mod elettroniku permezz tal-FOI Portal bl-użu tal-e-ID.

It-talbiet għandhom:

jipprovdu biżżejjed informazzjoni sabiex id-dokument mitlub ikun jista' jiġi identifikat;
jinkludu d-dettalji tal-identifikazzjoni tal-applikant kif meħtieġ mil-liġi;
jispeċifikaw indirizz postali sabiex jintbagħtu n-notifiki skont l-Att.

Dettalji tal-Proċedura Interna tal-Ilmenti

Applikant li t-talba tiegħu għall-aċċess għall-informazzjoni tkun ġiet miċħuda, jew li ma jkunx sodisfatt bl-informazzjoni pprovduta, bil-format li bih tkun ingħatat, jew b'estensjoni tal-perjodu ta' żmien għan-notifika dwar jekk it-talba hix se tintlaqa', jista' jressaq ilment lill-Aġenzija.

L-ilmenti għandhom jiġu indirizzati lill-Uffiċjal tal-FOI tal-Aġenzija, li għandu jirreferi l-materja lill-uffiċjal responsabbli mir-reviżjoni tal-ilment. L-uffiċjal responsabbli għandu jeżamina l-ilment u jipprovdi risposta fi żmien għaxar (10) ijiem ta' xogħol mill-wasla tal-ilment.

Fejn ilment jikkonċerna deċiżjoni li ma tingħatax aċċess għall-informazzjoni mitluba, l-uffiċjal responsabbli għandu jinforma lill-applikant bir-riżultat tar-reviżjoni u, fejn id-deċiżjoni oriġinali tinżamm, jipprovdi r-raġunijiet għal dik id-deċiżjoni. Fejn ilment jikkonċerna l-format li bih tkun ingħatat l-informazzjoni jew estensjoni tal-limiti ta' żmien statutorji, u d-deċiżjoni oriġinali tibqa' fis-seħħ, l-applikant għandu jingħata spjegazzjoni għaliex l-ilment ma jistax jintlaqa'.

L-applikanti jistgħu wkoll jagħmlu użu mill-Proċedura Interna tal-Ilmenti fejn l-Aġenzija tonqos milli tikkonforma mal-perjodi ta' żmien stabbiliti taħt l-Att dwar il-Libertà tal-Informazzjoni, inkluż meta n-notifiki jew tweġibiet ma jinħarġux fil-limiti ta' żmien applikabbli. F'każijiet fejn l-aċċess għall-informazzjoni mitluba jista' jingħata iżda l-limiti ta' żmien statutorji ma jkunux ġew osservati, kwalunkwe tariffa applikabbli relatata mal-provvista ta' dik l-informazzjoni titneħħa.

L-applikanti għandhom ukoll jiġu informati bid-dritt tagħhom li jappellaw jew inkella jressqu ilment quddiem il-Kummissarju għall-Informazzjoni u l-Protezzjoni tad-Data skont id-dispożizzjonijiet tal-Att dwar il-Libertà tal-Informazzjoni (Kap. 496 tal-Liġijiet ta' Malta).

Informazzjoni Oħra

Servizz.gov għandha tipproċessa t-talbiet u toħroġ risposta fi żmien stabbiliti taħt l-Att dwar il-Libertà tal-Informazzjoni.

Tista' tiġi imposta tariffa għall-provvista ta' aċċess għad-dokumenti. Kwalunkwe tariffa applikabbli għandha tkun limitata għall-ispiża biex id-dokument jitqiegħed għad-dispożizzjoni tal-applikant, inklużi l-ħin tal-ipproċessar u l-ispejjeż tar-riproduzzjoni, u m'għandhiex taqbeż €40, skont ir-regolamenti applikabbli.

Fejn il-limiti ta' żmien statutorji ma jkunux rispettati, kwalunkwe tariffa applikabbli għandha titneħħa.

Informazzjoni addizzjonali:

L-aċċess għad-dokumenti huwa limitat għal persuni eliġibbli kif definit fl-Att;
It-talbiet jiġu deċiżi fi żmien għoxrin (20) jum tax-xogħol, sakemm ma tingħatax estensjoni skont il-liġi;
L-aċċess jista' jingħata permezz ta' spezzjoni, kopji, mezzi elettroniċi jew estratti, kif xieraq;
It-talbiet jistgħu jiġu miċħuda biss skont ir-raġunijiet stabbiliti fl-Att dwar il-Libertà tal-Informazzjoni, u l-applikanti għandhom jiġu infurmati kif xieraq.