Ħarsa ġenerali
L-Iskema ta' Żvilupp tal-Prodott ta' VisitGozo tappoġġja l-ħolqien, it-titjib, it-tnedija u l-implimentazzjoni inizjali ta' prodotti, esperjenzi u inizjattivi li jsaħħu l-identità distintiva ta' Għawdex bħala destinazzjoni turistika ta' kwalità. L-iskema tappoġġja wkoll inizjattivi li jirrappreżentaw u jippromwovu lil Għawdex f'Malta u barra minn Malta, sabiex tiżdied il-viżibilità tal-gżira.
L-għanijiet ewlenin tal-iskema huma li:
• Jappoġġjaw l-iżvilupp ta' prodotti u esperjenzi turistiċi ġodda jew imsaħħa f'Għawdex.
• Isaħħu l-identità ta' Għawdex bħala destinazzjoni kulturali, kreattiva, ambjentali u esperjenzjali.
• Jinkoraġġixxu l-innovazzjoni fis-setturi tat-turiżmu, il-kultura u l-industriji kreattivi.
• Jappoġġjaw it-tnedija jew l-ewwel implimentazzjoni ta' prodotti u esperjenzi ġodda.
• Jattiraw aktar viżitaturi, inkluż żjarat matul il-perjodi barra l-aqwa staġun turistiku.
• Jippromwovu l-parteċipazzjoni ta' individwi u organizzazzjonijiet Għawdxin f'attivitajiet li jirrappreżentaw lil Għawdex lokalment u internazzjonalment.
L-iskema hija maqsuma f'żewġ oqsma:
Qasam 1: Żvilupp ta' Prodotti Turistiċi għal Għawdex
Tappoġġja l-iżvilupp, it-titjib u t-tnedija ta' prodotti, servizzi, avvenimenti u esperjenzi li jsaħħu l-offerta turistika ta' Għawdex.
Qasam 2: Rappreżentazzjoni ta' Għawdex f'Malta u barra minn Malta
Tappoġġja inizjattivi li jippromwovu, jirrappreżentaw jew juru lil Għawdex permezz ta' avvenimenti, wirjiet, festivals, kompetizzjonijiet u attivitajiet oħra organizzati f'Malta jew barra minn Malta.
X’ser tingħata
Applikazzjonijiet approvati jistgħu jibbenefikaw minn għotja finanzjarja biex jappoġġjaw spejjeż eliġibbli relatati direttament mal-iżvilupp u l-implimentazzjoni tal-inizjattiva proposta.
Livelli ta' Finanzjament
• Għotjiet Żgħar: sa €5,000
• Għotjiet Standard: minn €5,001 sa €10,000
Rata ta' Finanzjament
L-għotja tista' tkopri bejn 60% u 80% tal-ispejjeż eliġibbli, skont il-punteġġ miksub matul il-proċess ta' evalwazzjoni. L-applikant irid jiffinanzja l-bilanċ li jifdal permezz tar-riżorsi tiegħu jew minn sorsi oħra ta' finanzjament.
Spejjeż Eliġibbli Jistgħu Jinkludu:
• Spejjeż relatati mal-iżvilupp u t-tħejjija tal-inizjattiva.
• Ħlasijiet għal professjonisti, artisti, koordinaturi u kontributuri tekniċi.
• Kiri ta' postijiet, tagħmir u arranġamenti loġistiċi.
• Spejjeż ta' vvjaġġar u akkomodazzjoni relatati mal-proġett.
• Produzzjoni ta' kontenut awdjoviżiv, diġitali jew dokumentazzjoni.
• Attivitajiet ta' promozzjoni, komunikazzjoni u viżibilità tal-inizjattiva.
Eliġibbiltà
L-iskema hija miftuħa għal:
• Individwi, professjonisti, kreattivi, promoturi u prattikanti.
• Organizzazzjonijiet volontarji, NGOs, fondazzjonijiet, assoċjazzjonijiet u klabbs sportivi.
• Intrapriżi u negozji reġistrati f'Malta.
• Skejjel privati u istituzzjonijiet edukattivi mhux statali.
• Entitajiet reliġjużi, inklużi parroċċi u istituzzjonijiet simili.
• Kunsilli Lokali.
Kundizzjonijiet Speċifiċi Skont il-Qasam
Qasam 1 – Żvilupp ta' Prodotti Turistiċi għal Għawdex
• Miftuħa għall-kategoriji eliġibbli kollha msemmija hawn fuq.
• L-inizjattivi għandhom jiġu implimentati u mwettqa f'Għawdex.
Qasam 2 – Rappreżentazzjoni ta' Għawdex f'Malta u barra minn Malta
• L-applikanti għandhom ikunu bbażati f'Għawdex.
• L-inizjattivi għandhom juru b'mod ċar kif se jippromwovu jew jirrappreżentaw lil Għawdex barra mill-gżira.
Min Mhuwiex Eliġibbli
Dawn li ġejjin mhumiex eliġibbli biex japplikaw:
• Ministeri, dipartimenti, awtoritajiet, aġenziji u entitajiet tal-Gvern.
• Skejjel statali u istituzzjonijiet edukattivi statali.
Kundizzjonijiet Importanti
• Il-proġetti għandhom jibdew biss wara l-approvazzjoni uffiċjali tal-finanzjament.
• Il-proġetti għandhom jitlestew fi żmien massimu ta' 12-il xahar mill-approvazzjoni.
• Attivitajiet li jkunu diġà ntemmu qabel l-approvazzjoni ma jkunux eliġibbli.
• L-istess spiża ma tistax tiġi ffinanzjata minn aktar minn sors wieħed ta' fondi pubbliċi.
Kif tapplika
L-applikazzjonijiet jistgħu jiġu aċċessati fuq https://ghawdex.gov.mt/servizzi/ jew permezz tal-applikazzjoni MyGozo u għandhom jiġu sottomessi online.
Kronoloġija
Sottomissjoni
Valutazzjoni u Reviżjoni
22 jum
Reviżjoni tal-Eliġibbiltà
10 ijiem
Approvazzjoni
10 ijiem
