Edukazzjoni, Xjenza u Teknoloġija

Id-dritt ta’ kull stat biex jagħmel riċerka xjentifika marittima joħroġ mill-Konvenzjoni tal-Ġnus Magħquda dwar il-Liġi tal-Baħar, u dan huwa suġġett għad-drittijiet u dmirijiet ta’ stati oħra. Il-Continental Shelf Department fi ħdan il-Ministeru għall-Enerġija u l-Immaniġġjar tal-Ilma, huwa responsabbli biex jilliċenzja u jirregola r-riċerka xjentifika marittima fuq il-blata kontinentali ta’ Malta (inkluż l-ibħra interni u territorjali) skont ir-Regolament 6 tar-Regolamenti dwar il-Blata Kontinentali (S.L. 535.02).

Wara s-suċċess li kellna s-sena l-oħra, il-Ministeru għall-Ugwaljanza, ir-Riċerka u l-Innovazzjoni (MFER) bi pjaċir qiegħed iniedi mill-ġdid skema li tippromwovi l-innovazzjoni u l-promulgazzjoni tal-għarfien fis-soċjetà Maltija.

L-għan ta’ din l-iskema huwa li tappoġġja finanzjarjament lill-Organizzazzjonijiet Mhux Governattivi (NGOs) u lill-Organizzazzjonijiet Volontarji (VOs) biex iwettqu proġetti relatati mal-innovazzjoni fil-komunità (b’enfasi fuq ix-Xjenza, it-Teknoloġija, l-Inġinerija u l-Matematika). Il-proposti li jużaw approċċ b’enfasi fuq ix-Xjenza, it-Teknoloġija, l-Inġinerija, l-Arti u l-Matematika (STEAM) bħala punti t’aċċess biex jiggwidaw proċessi ta’ tagħlim, djalogu u ħsieb kritiku li jwasslu biex it-teorija u l-prattika jitħaddmu flimkien huma eliġibbli wkoll.