Pulizija, Ġustizzja u Difiża

Persuni li għandhom rapport pendenti mal-Korp tal-Pulizija ta' Malta jistgħu jiċċekkjaw u jimmonitorjaw ir-rapport.

Ċittadini Maltin jistgħu jiksbu ċertifikat tal-kondotta billi jmorru personalment fl-Uffiċċju tar-Records Kriminali fil-Kwartieri Ġenerali tal-Pulizija fil-Floriana, jew jimlew il-formola elettronika. Meta jmorru jiġbruha, l-applikanti jkollhom jippreżentaw personalment dokument validu ta' identifikazzjoni bħalma hu passaport validu jew karta tal-identità valida.

Fil-każi fejn l-applikant mhuwiex f'pożizzjoni biex jiġbor iċ-ċertifikat personalment minħabba kundizzjonijiet ta' saħħa, tista' tiġi ppreżentata ittra ffirmata kif inhu xieraq mill-applikant li tawtorizza lit-terza persuna u li għandha tinkludi l-indirizz tar-residenza tal-persuna li tkun se tiġbor iċ-ċertifikat, ir-raġuni għaliex l-applikant ma setax jiġbor iċ-ċertifikat, rapport mediku, kopja tal-karta tal-identità tal-applikant u karta tal-identità ta' min se jiġbor iċ-ċertifikat.

Għal applikanti Maltin li qed jgħixu barra minn Malta, għandha tiġi ppreżentata ittra mill-applikant lit-terza persuna li tawtorizzaha u li għandha tinkludi l-indirizz tar-residenza barra minn Malta tal-applikant flimkien man-numru tal-karta tal-identità tal-persuna awtorizzata. Hemm bżonn ukoll li tintwera kopja tal-passaport tal-applikant flimkien mal-karta tal-identità tal-persuna awtorizzata biex tiġbor iċ-ċertifikat tal-kondotta tal-applikant.

L-applikazzjoni għandha timtela biex tingħata liċenzja maħruġa mill-Kummissarju tal-Pulizija lill-persuna li qed tippromwovi, jew li tkun bi ħsiebha tippromwovi ġabra f'xi lokalità għal għan ta' karità jew għal għan approvat mill-Ministru responsabbli għall-Pulizija.

Meta l-applikant imur biex jiġbor il-liċenzja, għandu jipproduċi dokument validu ta' identifikazzjoni bħal passaport jew karta tal-identità.

Il-liċenzja tingħata jekk kemm-il darba l-ħtiġijiet li jinsabu fl-Att 279 dwar Ġbir Pubbliku jkunu mħarsa.

L-applikazzjonijiet li għandhom jinkludu t-tagħrif kif jidher fuq il-formola murija fl-Ewwel Skeda tal-Att relatat, trid tkun iffirmata minn għall-anqas tliet individwi.

Il-pubbliku jista' jirrapporta kwalunkwe telf ta' oġġetti taħt il-valur ta' €232.93. Persuna tista' tagħmel rapport f'isimha, f'isem ħaddieħor jew f'isem kumpanija.

Il-Pubbliku jista' jagħmel rapport ta' reat li ma jinvolvix emerġenza, jew wieħed li fih m'hemmx periklu li xi ħadd jitlef ħajtu. Ir-rapport għandu jikkonċerna reat li jkun diġà sar, u jkun jirrigwarda ħsara ta' valur ta' anqas minn €250 jew proprjetà misruqa ta' valur ta' anqas minn €232.94.

Il-possibbiltà li tibgħat assessment jew ilment fuq il-Korp tal-Pulizija ta' Malta jew fuq wieħed mill-membri tal-Korp. Il-formola tal-feedback tipprovdi lil min jużaha bl-għażla li jibqa' anonimu.

Il-pubbliku jista' jgħaddi informazzjoni b'mod kunfidenzjali u malajr lill-Korp tal-Pulizija ta' Malta bħalma huma rapporti li jirrigwardaw abbuż mid-drogi, moħqrija tal-annimali, atti ta' vandaliżmu, eċċ. Għal materji urġenti, ċempel 112.

Permezz ta' din il-formola, il-pubbliku ġenerali jista' jitlob informazzjoni mingħand il-Korp tal-Pulizija ta' Malta. L-informazzjoni mitluba tista' tvarja minn tagħrif ġenerali għal informazzjoni speċifika dwar każ li hu relevanti għall-applikant. L-informazzjoni mogħtija lill-applikant wara tiġi proċessata internament, u jekk tissodisfa l-kriterji stipulati mill-Att dwar il-Protezzjoni ta' Data, tingħata lill-pubbliku.

Dawk li għandhom liċenzja ta’ Kollettur B, skont il-Kapitlu 480 u LS 480.02, u li għandhom ukoll l-eID, jistgħu jġeddu l-liċenzja ta’ Kollettur B tagħhom onlajn.